Jóhanna Kristín Jónsdóttir, sálfræðingur

Jóhanna Kristín kemur einnig að ráðgjöf til fyrirtækja í samvinnu við aðra sálfræðinga teymisins. Jóhanna Kristín er á þjónustusamningi við VIRK og sinnir skjólstæðingum þeirra.

Jóhanna Kristín fékk sálfræðiréttindi árið 2004 frá Háskóla Íslands og hefur starfað við barnageðvernd í um tólf ár og við geðvernd fullorðinna nú í um fimm ár. Hún starfaði á göngudeild Barna- og unglingageðdeildar LSH frá 2005-2011 í almennu teymi og bráðateymi. Þar sinnti hún greiningum og meðferð helstu geð- og hegðunarraskana barna og unglinga og veitti foreldrum ráðgjöf. Hún sinnti samráðskvaðningu og var ráðgefandi sálfræðingur við Barnaspítala Hringsins. Jóhanna Kristín kom á fót meðferðarúrræðinu ,,Heilsuhópur‘‘ fyrir unglinga í yfirþyngd í samvinnu við fagaðila BUGL og var í forsvari rannsóknar á gagnsemi þess.

Jóhanna Kristín hóf sjálfstæðan rekstur eigin stofu, Barnageð sálfræðistofu og starfrækti hana á árunum 2011-2015. Stofan var fyrst staðsett í Lækningu, svo hjá Sálfræðingum Höfðabakka og síðast í Bæjarlind Kópavogi. Hún gerði hlé á rekstri stofunnar og hóf meistaranám í menningarstjórnun við Háskólann á Bifröst og stundaði það frá 2015-2017. Á námstímanum var hún jafnframt sálfræðingur háskólans og veitti nemendum og starfsfólki skólans sálfræðiþjónustu sem fólst í handleiðslu, einstaklingsviðtölum og námskeiðahaldi. Meistaraverkefni hennar úr menningarstjórnun fjallaði um mótun listrænnar sjálfsmyndar hjá stúlkum sem höfðu lengi sungið í kór.

Jóhanna Kristín hefur víða haldið fyrirlestra og erindi fyrir fagaðila og almenning. Má þar nefna:

• Birtingarmynd kvíða hjá börnum
• EMDR og meðferð barna
• Sjálfsmynd og líðan
• Sjálfstraust og samskipti
• Samskipti og samvinna í teymum
• Streita og kulnun í starfi

Jóhanna Kristín hefur mikla viðbótarmenntun á sviði meðferðarsálfræði og nýtir þær aðferðir sem hún telur henta hverjum skjólstæðingi og þeim vanda sem hann er að takast á við. Má þar nefna aðferðir hugrænnar atferlismeðferðar, EMDR áfallameðferð og klíníska dáleiðslu. Hún er meðlimur í Félagi sjálfstætt starfandi sálfræðinga (FSS) og Dáleiðslufélagi Íslands (DÍ).

Menntun
2017:  MA í menningarstjórnun frá Háskólanum á Bifröst
2015:  Alhliða þjálfun í klínískri dáleiðslu hjá Dr. Michael Yapko í samstarfi við EHÍ
2011:  EMDR áfallameðferð Level 1 og 2 á vegum HAP organization
2008: Sérnám í Hugrænni atferlismeðferð hjá Oxford Cognitive Center í samstarfi við EHÍ
2004: Cand Psych námsgráða í Sálfræði frá Háskóla Íslands
2001: BA í Sálfræði frá Háskóla Íslands

Rannsóknir
2017
,,Hvaða augum lít ég sjálfa mig?“ Áhrif langvarandi þátttöku ungra kvenna í kórstarfi á mótun listrænnar sjálfsmyndar, merkingarbær reynsla þeirra og væntingar til frama á sviði söngsins. Rannsókn til MA gráðu í menningarstjórnun við Háskólann á Bifröst.
2011
,,Unglingar í yfirþyngd og fjölskyldur þeirra: Leið til betra lífs og bættrar heilsu“. Rannsókn á hópmeðferðarúrræði fyrir unglinga í yfirþyngd á BUGL.
2004
,,Framburður barna í rannsóknarviðtali: Minnisgeta í ljósi aldurs og þroska”. Rannsókn á framburði barna í Barnahúsi til Cand Psych prófs í sálfræði við Háskóla Íslands.
2001
,,Börn og kynferðisbrot: Framburður barns í rannsóknarviðtali, orðalag ákæru og lyktir máls“, ásamt Þorbjörgu Sveinsdóttur. Rannsókn til BA gráðu í sálfræði við HÍ.

Ritaskrá
2009
Journal of Forensic Psychiatry and Psychology; ,,The ability of suspected victims of Childhood
Sexual Abuse (CSA) to give evidence. Findings from the Children´s House in Iceland” (RJFP-2009-0016). Meðhöfundar; Gísli H. Guðjónsson prófessor, dr. Jón F. Sigurðsson og Þorbjörg Sveinsdóttir.

Áhugamál
Jóhanna Kristín stundar söngnám hjá sönghúsinu Domus Vox og er meðlimur í kvennakórnum Vox Feminae undir stjórn Hrafnhildar Árnadóttur Hafstað. Hún lærði olíumálun hjá Myndlistarskóla Kópavogs og bregður sér stundum í gönguskóna til að næra huga og líkama með góðri útiveru.